La redolada

Villa de Tazones (Asturies)

Les Piedriquines asítiase nel barriu de La Talaya, que, como diz el propiu topónimu, ye un altu natural de praos llanos y verdes a la vera la mar. Esti barriu pertenez a la parroquia de Tazones, de la que ye cabeza parroquial la villa del mesmu nome, pueblu marineru perconocíu n’Asturies tanto poles sos peculiaridaes culturales y arquitectóniques, como pola so importancia histórica.

No tocante a la so arquitectura rescampla por conservar perfectamente la estructura de la villa marinera, con casines de corredor colgaes lliteralmente de les estreches cais y siempre mirando pa la mar. Del puertu, que caltién entovía una actividá curiosa, van servise los diferentes restoranes qu’enllenen la cai principal.

Nel sentíu históricu la villa ye conocida por ser el llugar onde desembarcó, en 1517, y procedente de Flandes, l’emperador Carlos I, momentu que se recrea en pueblu tolos meses d’agostu nuna fiesta que foi considerada d’Interés Turísticu Rexonal.

Al tiempu, y más p’allá de Tazones, la casa alcuéntrase a malpenes media hora de Xixón y quince minutos de Villaviciosa, polo que tien una situación bien amañosa pa conocer Asturies.